Amerikada Sovuq havo harorati tufayli odamlar halok bo‘ldi

AQShning shimoli-sharqiy qismida bo‘ron, ayoz, qor yog‘ishi va noodatiy past haroratlar bilan kechayotgan yomon ob-havo oqibatida halok bo‘lganlar soni 19 kishiga yetdi, deb xabar berdi Oko-planet.su nashri.

Aksariyat odamlar yo‘l-transport hodisalari yoki sovqotish oqibatida halok bo‘lgan. shimoli-sharqiy shtatlarning 100 mingdan ko‘proq aholisi kuchli shamol va qor tufayli elektr ta’minotisiz qolgan.

Sovuq ob-havo sababli Amtrak transport kompaniyasiga tegishli, Mayamidan Nyu-Yorkka ketayotgan yo‘lovchi poezdining uchta vagoni relslardan chiqib ketgan. Bunga relslarda muzlab qolgan, yo‘nalishlarni o‘zgartirish strelkasi sabab bo‘lgan. Voqea oqibatida hech kim jabrlanmagan.

Nyu-York shtati gubernatori Endryu Kuomo yomon ob-havo sababli favqulodda vaziyat tartibi kiritilishini e’lon qildi.

Ba’zi hududlarda 30 sm gacha qor yoqqan. Ob-havo mutaxassislarining ma’lumotiga ko‘ra, shunday sovuq harorat dam olish kunlari ham saqlanib qoladi.