Kia ўзининг катта йўлтанламасига ном танлади

Kia компанияси катта йўлтанламас прототипининг янги тизерини эълон қилди. Telluride (илгари концепт KCD12 индекси остида тилга олинарди) номини олган модель кейинги ҳафта Детройтдаги моторшоуда намойиш этилади.

Концепт-карнинг биринчи тизери йўлтанламасни олд томонидан намойиш этади, суратда эса унинг интерьери акс этади. Прототип электрон ускуналар панели ва руль ғилдирагида сенсор тугмаларига эга бўлади. Бундан ташқари, бу автомобиль Kia тарихидаги биринчи 3D-принтерда чоп этилган деталлар билан жиҳозланган модель бўлади. Хусусан, бундай унсурлар руль, ускуналар ва эшик панелларида қўлланилган.

Прототип Kia’нинг Калифорниядаги дизайн-студиясида ишлаб чиқилган. Ишлаб чиқарувчилар концепт энг охирги технологиялар билан жиҳозланишини, энг замонавий хавфсизлик тизимига эга бўлишини таъкидламоқда.

Норасмий маълумотларга қараганда, Kia Telluride прототипи Mohave йўлтанламасининг ўрнини эгаллайдиган янги модель учун асос бўлиб хизмат қилади.