Кореялик шифокорлар ўзбекистонлик бемор болаларни кўрикдан ўтказди

"Соғлом авлод учун” халқаро хайрия жамғармасининг тиббий ижтимоий марказида мамлакатимиз ва Жанубий Кореянинг Ин Ха университети госпитали шифокорлари ҳамкорлигида кам таъминланган, ижтимоий ҳимояга муҳтож оилалар фарзандлари чуқурлаштирилган тиббий кўрикдан ўтказилди.

Германиянинг "Friedensdorf International” халқаро ташкилоти, Жанубий Кореянинг "Save the Children” халқаро жамғармаси, KOFIH жамғармаси, Ин Ха университети госпиталларида туғма юрак нуқсони, терининг куйиш асоратлари, туғма қўл-оёқ бўғимлари ва бошқа касалликлар билан хасталанган бемор болалар бепул соғломлаштирилмоқда.

– Ўзбекистонга иккинчи марта келишим, – дейди Ин Ха университети госпитали кардиолог врачи, профессор У Сонг Ил ЎзАга берган интервьюсида. – 2013 йили мамлакатингиз шифокорлари билан ҳамкорликда ўтказилган чуқурлаштирилган тиббий кўрик жараёнида қарийб минг нафарга яқин аҳолига зарур тиббий ёрдам кўрсатган эдик. Шулардан энг оғир деб топилган уч беморни Кореяда даволадик. Аҳоли саломатлигини мустаҳкамлаш йўлида амалга оширилаётган бундай ҳамкорлик тиббиёт тизимида орттирилган илғор тажрибани оммалаштириш, ўзаро тажриба алмашишда ўз самараларини бермоқда.
Ўзбекистон Соғлиқни сақлаш вазирлиги билан ҳамкорликда 23 июнга қадар ўтказиладиган ҳафталик доирасида Жанубий Кореянинг Ин Ха университети госпитали малакали врачлари ва мамлакатимиз шифокорлари Тошкент шаҳрида, Тошкент ва Навоий вилоятларида чуқурлаштирилган тиббий кўрикларни ташкил этади. Оператив тиббий ёрдамга муҳтож бемор болалар мамлакатимиз ва Жанубий Кореядаги клиникаларда соғломлаштирилади.