Qochoq kuchukcha uyidan 700 km narida topildi

Ma’lum bo‘lishicha, Malibyu laqabli ushbu kuchukcha politsiya hamda Facebook ijtimoiy tarmog‘i orqali amalga oshirilgan kampaniya yordamida topilgan.

Kuchukcha egasi Brenton Chambers uning begona mashinalarga chiqib olish odati borligini ma’lum qilib, shu yo‘l bilan boshqa joyga borib qolganini taxmin qildi. Biroq uning kim bilan ketgani va qanday qilib Janubiy Avstraliyaga borib qolgani (ularning uyi Shimoliy Hududda) noma’lum.

Malibyu oradan 24 kun o‘tib, Janubiy Avstraliya va Shimoliy Hudud chegarasidagi Amatadan topilgan. Kuchukchaning xo‘jayini politsiya va kampaniyada ishtirok etgan Facebook foydalanuvchilariga minnatdorchilik bildirgan. Qochoq kuchukcha esa o‘zining "sayohati” bilan butun dunyoning diqqatini jalb qilishga muvaffaq bo‘ldi.