Главная » MAXALLIY YANGILIKLAR

ShHTga a’zo barcha davlatlarning rahbarlari Toshkent sammitida ishtirok etishini tasdiqladi

 ​

Toshkentda shu yilning 23–24-iyun kunlari O‘zbekiston Respublikasi Prezidenti Islom Karimov raisligida Shanxay hamkorlik tashkiloti Davlat rahbarlari kengashining yubiley majlisi bo‘lib o‘tadi. Shu munosabat bilan ShHT sammitining Toshkentdagi xalqaro matbuot markazida O‘zbekiston Respublikasi Tashqi ishlar vazirligi tomonidan mahalliy va xorijiy ommaviy axborot vositalari vakillari uchun brifing tashkil etildi. Bu haqda O‘zA xabar berdi.

ShHT Davlat rahbarlari kengashi majlisida Qozog‘iston Respublikasi Prezidenti Nursulton Nazarboyev, Xitoy Xalq Respublikasi Raisi Si Szinpin, Qirg‘iziston Respublikasi Prezidenti Almazbek Atambayev, Rossiya Federatsiyasi Prezidenti Vladimir Putin, Tojikiston Respublikasi Prezidenti Emomali Rahmon ishtirok etishi rasman tasdiqlangani ta’kidlandi.

Afg‘oniston Islom Respublikasi Prezidenti Ashraf G‘ani, Belarus Respublikasi Prezidenti Aleksandr Lukashenko, Mo‘g‘uliston Prezidenti Saxiagiyn Elbegdorj, Pokiston Islom Respublikasi Prezidenti Mamnun Husayn, Hindiston Respublikasi Bosh vaziri Narendra Modi, Eron Islom Respublikasi tashqi ishlar vaziri Muhammad Zarif kuzatuvchi davlatlar vakillari sifatida, Turkmaniston Prezidenti Gurbanguli Berdimuhamedov raislik qiluvchi mamlakat mehmoni sifatida ishtirok etadi.

Majlisda ShHT Bosh kotibi Rashid Alimov va ShHT Mintaqaviy aksilterror tuzilmasi Ijroiya qo‘mitasi direktori Yevgeniy Sisoyev ham qatnashadi.

ShHT sammitida xalqaro hamkor tashkilotlar rahbarlari — Birlashgan Millatlar Tashkiloti Bosh kotibi o‘rinbosari Jeffri Feltman, Mustaqil Davlatlar Hamdo‘stligi Ijroiya qo‘mitasi raisi — Ijrochi kotibi Sergey Lebedev, Kollektiv xavfsizlik shartnomasi tashkiloti Bosh kotibi Nikolay Bordyuja, ASEAN Bosh kotibi Le Liong Min, Osiyoda hamkorlik va ishonch choralari bo‘yicha kengashning ijrochi direktori Gun Szyanvey ham ishtirok etadi.

O‘zbekiston Respublikasi tashqi ishlar vaziri o‘rinbosari A. Nosirovning ma’lum qilishicha, tadbirda ishtirok etish uchun Toshkentga ShHTga a’zo davlatlar, xalqaro tashkilotlar, shuningdek, chet el ommaviy axborot vositalarining qariyb 1000 vakili tashrif buyuradi.

Bo‘lajak ShHT sammiti davlat rahbarlarining yubiley majlisi bo‘lib, Shanxay hamkorlik tashkiloti tuzilganining 15 yilligiga bag‘ishlanadi.

Davlat rahbarlari, majlis kun tartibiga muvofiq, ShHT doirasida serqirra va o‘zaro manfaatli hamkorlikni yanada chuqurlashtirish masalalarini muhokama etadi, shuningdek, dolzarb mintaqaviy va xalqaro muammolar yuzasidan fikr almashadi.

Davlat rahbarlari uchrashuvi yakunida asosiy hujjat — ShHT o‘n besh yilligining Toshkent deklaratsiyasi qabul qilinadi. Unda tashkilotning so‘nggi o‘n besh yillik faoliyati, a’zo davlatlarning ShHTni rivojlantirish istiqbollariga nisbatan kelishilgan yondashuvlari, shuningdek, joriy xalqaro hamda mintaqaviy vaziyat bo‘yicha pozitsiya o‘rin oladi.

Davlat rahbarlari 2025-yilgacha ShHTni rivojlantirish strategiyasini amalga oshirishga doir 2016–2020-yillarga mo‘ljallangan harakat rejasi va ShHTni rivojlantirish, unga a’zo davlatlar o‘rtasidagi hamkorlikni mustahkamlashga qaratilgan qator boshqa hujjatlarni tasdiqlaydi.

ShHTning bo‘lajak sammiti O‘zbekistonning tashkilotga raisligining so‘nggi tadbiridir. O‘zbekiston raisligida ShHT faoliyatini yanada takomillashtirish, tashkilot doirasida siyosat, xavfsizlik, iqtisodiyot va gumanitar aloqalar sohalarida o‘zaro hamkorlikni chuqurlashtirish borasida salmoqli ishlar amalga oshirildi. Davlat rahbarlari kengashining bo‘lajak majlisi kun tartibini mazmunan boyitishga alohida e’tibor qaratildi.

ShHT sammiti arafasida Toshkentda tashkilotga a’zo davlatlarning turli vazirlik va idoralar rahbarlarining qator uchrashuvlari o‘tkaziladi. ShHTga a’zo davlatlar madaniyat vazirlarining 21–22-iyun kunlari bo‘lib o‘tadigan navbatdagi yig‘ilishida madaniyat va san’at sohasida hamkorlikni yanada rivojlantirish masalalarini muhokama etish rejalashtirilgan.

22–23-iyun kunlari ShHT Ishbilarmonlar kengashi boshqaruvi va Banklararo birlashma kengashining ham majlislari o‘tkaziladi. Ularning doirasida tashkilotga a’zo va kuzatuvchi davlatlarning ishbilarmon hamda moliyaviy doiralar vakillarining savdo-iqtisodiy va investitsiyaviy hamkorlik sohasida ishtirokini faollashtirish haqida fikr almashish mo‘ljallanmoqda.

ShHT sammiti hujjatlari bo‘yicha yakuniy kelishish maqsadida 20–22-iyun kunlari ShHTga a’zo davlatlar milliy koordinatorlari kengashining yig‘ilishi bo‘lib o‘tmoqda.


Источник: daryo.uz
Категория: MAXALLIY YANGILIKLAR | Добавил: AdminoFF (21.06.2016)
Просмотров: 399 | Теги: ShHT | Рейтинг: 0.0/0
Всего комментариев: 0
avatar