АҚШда 5- синф ўқувчиси кучук боласи сабабли қўшни қизни отиб ташлади

Америкадаги мактаблардан бирининг 5- синф ўқувчиси ўзининг саккиз ёшли қўшнисини ўртасида кучук боласи сабабли жанжал келиб чиққани сабабли отасининг қуроли билан отиб ташлади, дея хабар бермоқда WBIR телеканали.

Уайт Пайн округи фуқаролари ўқ овозини эшитганларидан сўнг полицияга қўнғироқ қилишган. Ҳодиса жойига етиб келган полиция ходимлари эса бу ерда кўкрак соҳасидан ўқ еган қизни топишди. Қизалоқ касалхонага етказилганда, шифокорлар унинг жони узилганини маълум қилишди.

Полиция шерифи Бад МакКуаг (Bud McCoig)нинг хабар беришича, 12 ёшли бола 12 калибрли қурол билан қизни отиб ўлдирган. У боланинг нима сабабдан бу ишга қўл ургани ҳақида маълумот бермаган бўлса-да, қўшнилар болаларнинг кучук боласи сабабли жанжаллашиб қолганини айтишди.

Бола вояга етмаганлар бўйича биринчи даражали оғир жиноятни содир этганликда айбланиб ҳибсга олинди. Айни пайтда унинг бирор руҳий хасталик билан оғримагани аниқлаштирилмоқда.