Қозоғистон Ўзбекистонга нефть экспорт қилади

Қозоғистон ОАВнинг хабар беришича, Остонада Парламентнинг қуйи палатасида бўлиб ўтган Ҳукумат соатида республиканинг нефть ва газ вазири Узақбай Қарабалин Россияга нисбатан қўлланилаётган санкциялар Қозоғистонннинг нефть ва газ секторига қандай таъсир ўтказиши мумкинлиги ҳақида фикр билдирган.

Маълумки, ўтган ҳафтада АҚШ Конгресси Россияга нисбатан янги санкцияларни қўллаш ҳақида қарор қабул қилди. Бундан ташқари, Германия канцлери Ангела Меркель Украининг ҳудудий яхлитлигига доир вазият чигаллашган тақдирда Россияга нисбатан янги санкцияларни қўллаш эҳтимоли мавжудлигини айтиб ўтди. Қозоғистон Республикаси ҳукуматининг фикрича, бу Қозоғистоннинг нефть ва газ тармоғига ҳам таъсир ўтказади, деяхабар беради CA-News.

- Балки ўшанда нефть маҳсулотларининг катта миқдори бизга келади, - деб таъкидлади Ў.Қарабалин. - Бу бир томондан яхши, чунки биз ўзимизни нефть махсулотлари билан тўлиқ таъминлаяпмиз. Лекин, иккинчи томондан, арзон нефть махсулотлари бозорни тўлдирадиган бўлса, товарнинг кўпайиб кетиши нефть заводларимизнинг ишини қийинлаштириши мумкин. Бу ерда биз иккала вариант ўртасида мувозанат сақлаб турибмиз, - деб якунлади ўз сўзини вазир.

Хусусан, Қозоғистон нефть ва газ вазирлиги раҳбарининг айтишича, турли экспорт йўналишлари кўриб чиқилмоқда. Озарбайжон ва Грузия орқали Қора денгизга чиқиш, Хитойга, шунингдек, Ўзбекистон ва Туркманистонга жанубий йўналиш бўйича нефть маҳсулотлари етказиб бериш мумкин.