Фарғонада ўз фарзандини 2 минг долларга пуллаётган аёл қўлга олинди

Фарғона вилоятида ўзининг янги туғилган боласини 2200 долларга сотмоқчи бўлган аёл қўлга олинди. Бу ҳақда “Ҳуқуқ” нашри ёзмоқда.Айтилишича, Холида Зарипованинг беш фарзанди бўлган.

У бир неча йилдан буён таниши Шарифжон Бурхонов билан шаръий никоҳ асосида яшаб келган.Бир куни у шифокорга учраб, олтинчи фарзандга ҳомиладор бўлиб қолганини билган. Аммо Зариповага олтинчи фарзанд керак эмасди, негаки моддий қийинчиликда яшарди. У синглиси Дурдона билан маслаҳатлашиб, болани сотиб юборишга қарор қилган.

Шу мақсадда опа-сингиллар Фарғона туман тиббиёт бирлашмаси туғруқ бўлими бошлиғи Зубайда Аҳроровага учраган ва болани сотиб беришни сўраган. Шифокор аёл яқинда туғилган боласи ўлиб қолган Одина Мадаминовани “харидор”ликка кўндирган.

Режага мувофиқ, боланинг онаси 1800 доллар, ўртадаги “даллол” Аҳророва эса 400 доллар олиши керак эди.Аммо жиноятчилар воқеа жойида, жиноят устида қўлга олинган.
Туман суди қарори билан жиноий келишув иштирокчиларининг барига тегишли жазо тайинланди.